அறிவியலில் உள்ளதை ஏற்க தத்துவாம்ச போதை மட்டும் போதாது

பரிணாமவியல் குறித்து உலகெங்கும் உள்ள பழமைவாதிகளால் பல கேள்விகள் எழுப்பப் பட்டு வருகின்றன. கேள்விகள் என்பது ஒரு ஆரோக்கியமான விடயம், கேள்விகளுக்கு விடைத் தேடும் போது தான் பல அறிஞர்கள் பல புதியவைகளைக் கண்டறிந்தார்கள், உருவாக்கினார்கள். ஆனால் சில நம்பிக்கைகள் மக்கள் சிலரில் ஆழ ஊடுருவி விடுவதால் அவற்றில் பிரிந்து தன்னிச்சையாகச் சிந்திக்கவோ, பகுத்தறிவோடு பயணிக்க மறுக்கின்றார்கள். 

இருந்த போதும் பண்டைய காலம் போல் இல்லாமல் இன்றைய புதிய உலகில் அறிவியல் என்பதை உலகச் சமூகங்கள் ஏற்கின்றன. பரிணாமவியல் மட்டுமல்ல அறிவியலில் கூறப்படும் எந்தவொரு விடயங்களும் வெறும் நம்பிக்கை சார்ந்து மட்டும் சான்றோரால் ஏற்கப்பட்டு விடுவதில்லை. அறிவியல் கூற்றுக்கள் ஒவ்வொன்றும் ஆராயப்பட்டு அவற்றின் மெய், பொய்கள் நிர்ணயிக்கப்படும். அறிவியல் கூற்றுக்களைக் கோட்பாடுகள் என்றும் அழைக்கின்றனர். 

அறிவியலாளர்கள் ஒரு விடயத்தை நியதி, விதி, கோட்பாடு என வகுக்க முன்னர் எண்ணற்ற வழிமுறைகளில் ஆராய்வார்கள். இத்தகைய கோட்பாடுகளைப் ''பொய்'' என நிறுவி விட்டால் அவை புறக்கணிக்கப்படும். யாராவது இந்த அறிவியல் கோட்பாட்டில் முழுவதுமோ அல்லது பகுதியோ தவறாகக் கண்டால், அந்தத் தேற்றம் மாற்றப்படுகிறது, அல்லது முழுவதும் தூக்கி எறியப்படுகிறது. அதே சமயம் பொய் என நிரூபிக்காத பட்சத்தில் அவற்றின் உண்மைத் தன்மைக்கு ஏற்ற சான்றுகளைச் சேகரித்துக் கொண்டே இருப்பார்கள். 

ஒரு அறிவியலை அறிவியல் என நிறுவதற்கு ஒரு சில வழிமுறைகளை அறிவியலாளர்கள் பின்பற்றுகின்றார்கள். அவை யாவன 

1. இயற்கையை அவதானித்து அறிதல் : பண்டைய காலம் தொடங்கி மனிதர்கள் இயற்கையின் ஒவ்வொரு அசைவுகளையும் அவதானித்து வருகின்றார்கள். அவர்களின் அறிவுக்கு ஏற்றார் போல இயற்கையின் இயக்கங்களுக்குத் தத்தமக்கான கோட்பாடுகளை வகுத்துக் கொண்டார்கள். அவைகள் பலவும் பிற்காலத்தில் பொய்மை, தவறு என நிரூபித்துப் பல ஆராய்ச்சியாளர்கள் தக்க சான்றுகளுடன் மாற்று விளக்கங்களை முன் வைத்தும் உள்ளார்கள். இத்தகைய நிலையில் பண்டைய கோட்பாடுகளைப் பின்பற்றுவோர்கள் புதிய தெளிவான விளக்கங்களை மறுதலிப்பதும், வன்முறை ஊடாக அடக்க நினைப்பதும் வரலாற்று உண்மைகள். 

2. கருதுகோளை உருவாக்குதல் : இயற்கையை அவதானிப்பவர்கள் அதன் இயக்கங்களை விளக்கும் முகமாகக் கருதுகோள்களை உருவாக்குவார்கள். கருதுகோள் (hypothesis) என்பது ஒரு பிரச்சினைக்குத் தீர்வாக முன் வைக்கப்படும் தற்காலிகமான ஓர் ஊகம் ஆகும். இது, ஒரு தோற்றப்பாட்டை விளக்குவதற்காக முன்வைத்த ஒரு கருத்தாகவோ அல்லது பல தோற்றப்பாடுகளுக்கு இடையே இருக்கக்கூடிய தொடர்புகள் குறித்த தர்க்க முறையான ஒரு கருத்தாகவோ இருக்கலாம். அறிவியல் வழிமுறைகளின்படி ஒரு கருதுகோளானது சோதனை செய்து பார்க்கக் கூடியதாக இருத்தல் வேண்டும். அறிவியலாளர்கள், இத்தகைய கருதுகோள்களை, முன்னைய கவனிப்புகளிலிருந்தோ இருந்தோ, அறிவியற் கோட்பாடுகளை விரிவுபடுத்துவதன் மூலமோ ஊகித்து முன்வைக்கிறார்கள். 

சோதனை செய்ய இயலாத கருதுகோள்கள் பலவும் சமயம், நம்பிக்கைகள், தத்துவங்கள் எனப் பழமைவாதிகளால் தலைமுறை தலைமுறையாகப் பயிற்றுவிக்கப் பட்டு கடத்தப்பட்டு வருகின்றது. பல சமயங்களில் சோதனைகளில் பொய்த்து போகும், சோதனை செய்ய இயலாத கருதுகோள்களுக்கு எதிராக அறிவியல் பூர்வமாக நிரூபிக்கப்பட்ட கருதுகோள்களைப் பழமைவாதிகள் ஏற்பதில்லை. 

3. கருதுகோள்களைப் பரிசோதிப்பதற்காகக் கூடுதல் தகவல்களை/சான்றுகளைச் சேகரித்தல் : ஒரு கருதுகோள்களை நிரூபிக்கப் பல்வேறு சான்றுகளை அறிவியல் உலகம் கோருகின்றது. வெறும் நம்பிக்கை அடிப்படையில் எவற்றையும் ஏற்கவோ, நிராகரிக்கவோ இயலாது என்பதே அறிவியலின் நிலை. தக்க சான்றுகளைச் சேகரித்துக் கொண்டு போக வேண்டும். கிடைக்கப்பட்ட சான்றுகள் கருதுகோளை ஆதரிக்க வலுச் சேர்க்கலாம், அல்லது கருதுகோள்களைத் தக்க சான்றுகளுக்கு அமைய திருத்தவோ, கைவிடவோ வேண்டும் நிலை ஏற்படலாம். 

கருதுகோள்களை அறிவியல் அறிஞர்கள் பொய்ப்பிக்கக் முடியாத அளவுக்கு இருத்தல் வேண்டும். அவர்கள் ஏற்கனவே நிறுவப்பட்ட சான்றுகள், முடிவுகள், விதிகள் ஊடாக அவற்றைப் பல்வேறு வழிமுறைகளில் சோதனை செய்து பார்ப்பார்கள். 

4. ஒரு கருதுகோள் அறிவியல் கோட்பாடாக அறியப்பட வேண்டுமெனில், அது ஒரு பெரிய எண்ணிக்கையிலான சோதனைகளில், பல்வேறு இடங்களில், வெவ்வேறு விஞ்ஞானிகளால் உறுதிப்படுத்தப்பட வேண்டும், மற்றும் சோதனை செய்யும் ஒவ்வொரு முறையும் அது நிரூபிக்கப்பட வேண்டும். 

5. ஒரு அறிவியல் கோட்பாட்டில் ஒரு விதிவிலக்குக் கண்டுபிடிப்பது ஒரு முக்கிய நிகழ்வாக உள்ளது, மற்றும் ஒரு விஞ்ஞானி அப்படிப்பட்ட ஒரு விதிவிலக்கை கண்டுபிடிப்பதன் மூலம் பிரபலமான முடியும். ஐசக் நியூட்டனின் இயக்கவியல் விதிகளுக்கு ஒரு விதிவிலக்கை ஐன்ஸ்டீன் கண்டுபிடித்தார், அதன் மூலம் அவர் பிரபலமானார். பல நூறு ஆண்டுகளாக ஏற்கப்பட்டு இருந்த நியூட்டனின் கோட்பாடு, மாற்றப்பட வேண்டியதாக இருந்தது, அது மாற்றப்பட்டும் விட்டது. 

உண்மையான விஞ்ஞானிகள் ஒரு கருதுகோளையோ, கோட்பாட்டையோ தனிப்பட்ட ரீதியாகப் பாதுகாக்க உண்மையான சான்றுகளையோ, அவதானிப்புக்களையோ புறக்கணிக்க மாட்டார்கள். நவீன அறிவியல் முக்கியக் கோட்பாடுகளைப் பட்டியலிடுகின்றன. இந்தக் கோட்பாடுகள் பல முறை ஆயிரக்கணக்கான சோதனை செய்யப்பட்டும் விதிவிலக்கு ஏதும் இல்லாமல் இருக்கின்றன. அவை யாவன : 

பருப்பொருள் ஆற்றல் காப்பு கோட்பாடு - The law of conservation of mass and energy
வாழும் உயிரினங்கள் செல் கோட்பாடு - The cell theory of living organisms
பரிணாமவியல் கோட்பாடு - Evolutionary Theory
வானியல் பால்மண்டல கோட்பாடு - Theory of galactic astronomy
சார்பியல் கோட்பாடு - Theory of relativity
குவாண்டம் கோட்பாடு - Quantum Theory 

என்பவை முக்கியமான சில. 

தமிழறிவோம் : 

கருதுகோள் - Hypothesis; கோட்பாடு - Theory; தரவு, சான்று - Evidence;

நன்றிகள் : முனைவர் கிரக் கிருக்கோனிஸ், விக்கிப்பீடியா தமிழ், தமிழ்நாடுப் பாடநூல் கழகம்