பிரித்தானிய முஸ்லிம் எம்.பி களுக்கு மரண அச்சுறுத்தல்கள் ?

பிரித்தானியாவின் லேபர் கட்சியைச் சார்ந்த முஸ்லிம் எம்.பியான சாதிக் கான் என்பவர் தற்சமயம் மிகுந்த காவல்த்துறை பாதுக்காப்பில் இருந்து வருகின்றார். அவர் செய்த ஒரே விடயம் சமத்துவத் திருமணத்துக்கு ஆதரவாகப் பாராளமன்றத்தில் வாக்களித்தமை தான். அதற்குக் கடும் கண்டனமும், கொலை மிரட்டலும் விடுத்துள்ளார் ப்ராட்போர்ட்டை ச்ஏர்ந்த ஜாமியா இஸ்லாமிய ரிஸ்வியா பள்ளிவாசலைச் சேர்ந்த இமாம் முப்தி முகம்மத் அஸ்லாம் நக்ஸ்பாண்டி பந்தல்வி என்பவர். சாதிக் கான் உட்பட ஐந்து முஸ்லிம் எம்.பி.க்கள் சமபாலினத்தவர் திருமணம் செய்து கொள்ள அனுமதிக்கும் புதிய சட்டத்துக்கு ஆதரவாக வாக்களித்திருந்தனர். அந்த ஐவருக்கும் பல இஸ்லாமியர்களிடம் இருந்து கொலை மிரட்டல்கள் வந்த வண்ணம் உள்ளது. 

இது குறித்துச் சாதிக் கான் எம்.பி, '' திருமணம் என்பதில் எனக்கு முழு நம்பிக்கை உண்டு. திருமணம் என்பது நீண்ட கால உறவுக்கும், அன்புக்குமான ஒரு அடையாளம், அத்தோடு காதல் உறவுகளுக்குத் தேசம் திருமணப் பந்தத்தின் ஊடாகவே முழு ஆதரவையும், அங்கீகாரத்தையும் தருகின்றது. தம்பதிகள் ஒருவருக்கு ஒருவர் அன்பு செலுத்தவும், நீண்ட கால உறவு கொள்ளவும் பாலியல் நாட்டம், பாலியல் அடையாளம் கடந்து திருமணத்துக்கு ஆதரவு தருவதில் எனக்கு முழு நம்பிக்கை உள்ளது'' என்றார். 

ஆனால் இங்கிலாந்து மற்றும் பாகிஸ்தானைச் சார்ந்த பல இஸ்லாமிய மதக்குருக்கள் இவர்கள் அனைவரும் இனி முஸ்லிம்களாக இருக்க இயலாது எனவும், அவர்கள் கடுமையாகத் தண்டிக்கப்படல் ( மரணம் ) வேண்டும் எனவும் கூறியுள்ளனர். 

அத்தோடு இங்கிலாந்தில் இனவெறி பரப்பி வரும் கடும் போக்கு அமைப்பான அல் முகாஜிரோம் என்ற அமைப்பின் தலைவர் அஞ்சம் சௌத்ரி இந்த எம்.பி.களுக்கு எதிராக ஆர்ப்பாட்டம் ஒன்றையும் நடத்தியுள்ளான். 

ஆனால் பெரும்பான்மையான இங்கிலாந்து முஸ்லிம் மக்கள் சமத்துவத் திருமணத்துக்கு ஆதரவு தருவதாகத் தொழிலாளர் கட்சியின் முக்கியக் கொள்கை பரப்பு செயலாளரும், சம பாலினத்தவரின் உரிமைகளுக்கு ஆதரவாகப் போராடி வருபவருமான பீட்டர் தாட்சல் கூறியுள்ளார். 

'' பெரும்பான்மையான முஸ்லிம் எம்.பி.க்கள் சம பாலினத் திருமணத்துக்கு ஆதரவாக வாக்களித்தது மகிழ்ச்சி தருகின்றது. சமத்துவத் திருமணத்தைத் தடை செய்வது என்பது நிச்சயமாக ஒதுக்கு முறையாகும். ஒதுக்கி வைத்தல் என்பது இஸ்லாமிய பண்பு கிடையாது. ஒரு சில இனவெறி பரப்பும் இஸ்லாமியர்களே இதனை எதிர்க்கின்றனர். ஆனால் இஸ்லாம் காதலையும், திருமணத்தையும் ஆதரிக்கின்றது. சம பாலின தம்பதிகளும் உண்மையாகக் காதலிக்கின்றார்கள், அவர்கள் திருமணம் செய்து கொண்டு வாழ்வதை மதக்குருக்கள் வரவேற்க வேண்டும்.  

இஸ்லாமியர்களில் உள்ள சிறு பிரிவு கடும்போக்காளர்களே இதற்கு எதிர்ப்பு தெரிவிக்கின்றனர். அவர்கள் நிச்சயம் பிரித்தானியாவின் ஒட்டு மொத்த முஸ்லிம்களைப் பிரதிபலிக்க மாட்டார்கள். சமத்துவ முஸ்லிம்களும், சம பாலினத்தவருகளும் இவ்வாறான கடும் போக்களர்களைக் கட்டுப்படுத்த உழைத்து வருகின்றார்கள். இன ஒதுக்கு முறைகளும், வன்முறைகளும் இரு சமூகத்தையும் பாதிக்கும் என்பதை உணர்ந்துள்ளார்கள்.  

அது மட்டுமில்லாமல் பிரித்தானியாவில் பெரும்பங்கான முஸ்லிம் சம பாலின சமூகமும் உள்ளது. முஸ்லிம் சம பாலினத்தவருகளுக்கு எனப் பற்பல அமைப்புக்களும், இமாம்களும் கூட உள்ளனர். முஸ்லிமாகவும், சம பாலினத்தவராகவும் வாழ முடியும் என அவர்கள் நம்புகின்றார்கள். '' என அவர் கூறினார். 

டென்மார்க்கைச் சேர்ந்த சம பாலின முஸ்லிம் போராளியும், மொழியியல் வல்லுநருமான மிக்கேல் சினான் என்பவர் முஸ்லிமாகவும், சம பாலினத்தவராகவும் இருப்பதில் எந்த வித பிரச்சனையும் இல்லை எனக் கூறுகின்றார். 

'' முஸ்லிம்களாகிய நாங்கள் இன்று பெரும் தொகையில் இருக்கின்றோம், அதனால் பழம் வாழ்க்கை முறையில் வாழ்வது என்பது இயலாத காரியமாகும். கிறித்தவர்கள் எவ்வாறு விவிலியல் சொல்வது போலவே முழுமையாக வாழ முடியவில்லையோ, அதே போல முஸ்லிம்களாகிய நாமும் வாழ முடியாது. இதனைச் சில பயங்கரவாதிகளால் ஏற்றுக் கொள்ள முடிவதில்லை.  

ஒரு தானிஸாக இருப்பதில் நான் பெருமையடைகின்றேன், ஏனெனில் கருத்துச் சுதந்திரம், மதச் சுதந்திரம் என்பது இங்கு உள்ளது. ஒரு சில விசமிகளால் இங்குப் பிரச்சனை இருக்கின்றது தான், ஆனால் உண்மையில் அவர்கள் இச் சமூகத்தைச் சேராதவர்கள். அவர்களை நான் மதிக்கின்றேன், இருந்தாலும் அவர்களால் இங்கு இணைந்து வாழ முடியவில்லை என்றால் தாராளமாக அவர்களுக்கு ஏற்றார் போல உள்ள நாடுகளுக்குப் போய் விடுவதே சிறந்தது '' என்றார் அவர்.

சமத்துவ ஜனநாயக விழுமியங்களோடும், சமாதானத்தோடும் வாழ முற்படும் எந்தவித சிறுபான்மை இன சமூகத்துக்கும் நாம் முழு ஆதரவு அளிக்க வேண்டும். குறிப்பாக துவேசங்களையும், வன்முறைகளையும் தூண்டி விடும் பயங்கரவாதிகள் ஒரு நாகரிக நவீன சமூகத்துக்கு ஏற்புடையவர்களே அல்ல, அவர்களையும், அவர்களது விச பரப்புரைகளைய்ம் முற்றாக அழித்து விடுவதே சாலச் சிறந்தது. உலகின் வல்லரசாகவும், முழு சுதந்திரமும் மிக்க இங்கிலாந்து போன்ற நாட்டின் ஒரு பாராளமன்ற உறுப்பினருக்கே 24 மணிநேர பாதுக்காப்பு தேவைப்படும் அவலம் எழுந்துள்ளது நிச்சயம் வேதனையான ஒன்றே ஆகும்.

நன்றி: பிரிதிங்கர்